Impadamag ti Department of Public Works and Highways (DPWH) a pito a national road sections iti agtaltalinaed a sarado, partikular kadagiti rehiyon ti Cordillera Administrative Region (CAR), Region III, ken Region IV-A.
Daytoy ket gapo kadagiti insidente ti landslides, panaglayos, ken panakadadael ti paset dagiti kalsada gapo iti nagsasaruno nga epekto ti habagat ken dagiti bagyo a Crising, Dante, ken Emong.
Karaman kadagiti kalsada nga apektado ket iti Kennon Road idiay Tuba, Benguet ken Jct Talubin-Barlig–Paracelis-Calaccad Road idiay Mountain Province.
Kabayatanna, limitado met a madalanan dagiti 16 a national roads gapo kadagiti nadadael a detour road, panaglayos, road slips, ken precautionary closures partikular kadagiti rehiyon ti CAR, Region I (La Union ken Pangasinan), Region III (Bulacan ken Pampanga), Negros Island Region, ken Region IX (Zamboanga del Norte).
Kaadoan kadagiti nadakamat a kalsada ket agdama a matartarimaan wenno agtultuloy nga ob-obserbaran.
Agtultuloy met iti panangipadamag ti DPWH dagiti national roads ken rangtay a mabalinen a dalanan manipud kadagiti a rehiyon.#
