BR LA UNION – Natay iti lima a tattao a pakairamnanan ti maysa a pulis idiay New York kalpasan ti pammaltog nga inaramid ti maysa a lalaki idiay Midtown Manhattan ken armado ti high powered firearm nga AR-style rifle.
Malaksid kadagiti natay, dosena pay ti naipadamag a nasugatan iti insidente, maibasar iti report ti ABC News.
Napasamak ti pammaltog iti 44-storey building a Midtown Manhattan a pagnanaedan dagiti nangangato nga opisyal iti financial firms, agarop alas 6:30 ti rabii ti Lunes, oras idiay Amerika.
Maibasar iti report, nakasuot ti bulletproof vest iti suspek ken nagbarikada daytoy iti uneg ti pasdek, a masarakan iti 345 Park Avenue, sakbay a “na-neutralize” dagiti otoridad.
Binigbig ti pulisya iti suspek a ni Shane Tamura, 27-anyos a lalaki manipud Las Vegas ken maipagarop a nasarakan a natay manipud iti self-inflicted gunshot wound.
Kinumpirma ni Mayor Eric Adams, nga adu ti nasugatan iti insidente.
Kinuna met ti New York Police District Commissioner a kontrolado dan iti sitwasyon.
Simmungbat met ti FBI tapno tumulong bayat nga agtultuloy ti imbestigasyon ken saan pay a nalawag iti motibo ti pammaltog.
