BR LA UNION – Mamati ni sigud a Supreme Court Associate Justice Adolfo Azcuna nga adda pay laeng ti gundaway a mangkuwestiyon iti desisyon ti Korte Suprema seknan iti impeachment complaint vs VP Sara Duterte.
Daytoy ket laksid nga unanimous iti nagbalin a desisyon ti kangatuan a korte ti pagilian.
Segun kenni sigud a Justice Azcuna, mabalin pay laeng nga ipila ti House of Representatives ti motion for reconsideration (MR) tapno kuwestionaran ti nasao a desisyon.
Patien ti sigud nga associate justice a kanayon nga adda gundaway a mangbaliw iti desisyon ti korte, nangruna no adda dagiti baro nga argumento a maiparang wenno maiprisintar. Kinunana a mabalin met a baliwan ti botos ti dadduma kadakuada.
Dinakamat pay ni Azcuna ti saan a panangted ti Korte Suprema iti gundaway iti Kamara a sumungbat wenno agkomento iti desisyon ti nangato a korte.
Kinunana a nalawag a panaglabsing daytoy iti prinsipiyo ti due process, isu a nasayaat latta daytoy a gundaway a mangkuestion iti desisyon.
Idi Hulyo 25, nangipaulog ti Korte Suprema iti desisyon a naan-anay a panangideklara dagiti articles of impeachment kontra iti bise presidente kas uncostitutional.
Depensa ti high court, linabsing ti complaint iti 1-year bar rule nga itud-tuding ti konstitusyon.
Iti nasao nga allagaden et mangituding ti maysa a tawen a baet sakbay a mangidatag manen ti maysa nga impeachment complaint kontra iti maysa nga impeachable official ti pagilian.
