BR LA UNION – Saan nga inlibak ni AGAP Partylist Rep. Nicanor Briones nga isuna ti naala iti video nga agbuy-buya ti online sabong iti cellphone na, iti kangitingitan ti session idiay House of Representatives.
Kinuna na a ti nasao a video ket paset ti mensahe nga impatulod kenkuana ti cabagyanna, a nangimbitar kenkuana nga ag-sponsor ti derby.
Inlawlawag na a saanna nga ammo ti ag-pallot ken agtaya ken imbaga na nga awan ti online wallet na.
Nagparang daytoy tapno aklonen ti ladawan, agsipudta saanna a kayat a mairam-raman iti kongreso ken saanna a kayat nga ibaga ti tao nga awan ti ar-aramidenna ditoy.
Impaganetget na, nga adda ti mangsab-sabotahe iti trabaho na nangruna ket adu kunana iti maipagarop a napasaktanna nga smuggler.
Kimmiddaw metten daytoy ti dispensar iti House of Representatives ken iti publiko gaputi kontrobersiya ken pinakawanna metten iti nangala ti video nga awan ti pammakada, a maysa a panaglabsing iti Data Privacy Act.
Gaputi dayta, mangidatag daytoy ti gakat a manglaban iti anyaman a klase ti online sabong.
