Napaay a makabirok ti DNA profile ti Philippine National Police (PNP) Forensics Group kadagiti baro a rekobre a tultulang dagiti Philippine Coast Guard (PCG) technical divers idiay Taal Lake, Batangas.
Iti maysa a press conference idiay Kampo Krame ket imbatad ni PNP Spokesperson Police Briadier General Jean Fajardo a nagbalin a karit para ti forensics group ti panagbirok kadagiti DNA profiles manipud kadagiti nasao a tulang gapo iti kinabayag dan nga adda iti danom.
Kinunana a dakkel pay ti posibilidad a kontaminadon dagiti tulang kalpasan a maibabad ti uppat a tawen isu a marigatan dagiti otoridad a birukan daitoy iti DNA samples.
Nupay napaay iti DNA profiling, pinasingkedan met ni Fajardo nga adda ti tallo a DNA profiles ti naberipika da kadagiti tulang a nakali iti sementeryo idiay Batangas: dua lallaki ken maysa a babai.
Kabayatanna, nagnegatibo met iti DNA samples ti cross matchings dagiti 23 a kakabagian dagiti missing sabungeros nga immanamong a mausar iti samples para iti reference.
Kasaruno daitoy ket nagpanawagan manen ni Fajardo kadagiti dadduma pay a kakabagian dagiti biktima nga tumulong iti imbestigasyon ken palubosan a maadal dagiti DNA samples da para iti cross-matching.
Iti agdama ket nainget iti koordinasyon ti PNP ken Department of Justice (DOJ) para ti pannakaresolbar ti kaso kasta met nga agtultuloy latta dagiti search and retrieval operations ti PCG agingga malikmot da ti intero a Taal Lake.
