BR LA UNION – Nangipasdek ti tents iti Philippine Navy (PN) Northern Luzon Naval Command tapno pagakaran dagiti evacuee a saan pay a nakasubli iti bukod da a pagtangan, gaputi nalawa nga epekto ti nagsasaruno a bagyo Crising, Dante, ken Emong.
Dagiti nasao a tent ket naipatakder iti sumagamano a lugar ditoy probinsya ti La Union ken agserbi a temporaryo nga evacuation center para kadagiti immakar a residente.
Iti nasao nga addang ket tapno mausar manen dagiti estudyante iti silid-pagadalan iti panagsubli da iti klase, kalpasan ti pannakausar kas evacuation center kadagiti naglabas nga aldaw gapu iti panagduprak dagiti bagyo ken habagat.
Ditoy La Union, aganay 70,000 a pamilya manipud iti nasurok 400 barangay iti nadetermina nga apektado.
Umabot met iti nasurok 16,000 a babbalay iti nailista a nadadael ditoy probinsya gapu iti nagsasaruno a kalamidad.
Iti agdama, agtaltalinaed a naka-deploy ti sumagmamano a team manipud iti nasao a command tapno tumulong iti naduma-duma a humanitarian mission iti Northern Luzon, bayat nga agtaltalinaed a layos ti sumagmamano pay laeng a lugar iti Ilocos Region.
