BR LA UNION – Inawat iti negosyante a ni Atong Ang iti pormal a panangidatag dagiti kaso kontra kenkuana seknan iti pannakairaman na iti kaso dagiti missing sabungeros.
Daytoy ket kasaruno ti panangidatag iti pamilya dagiti missing sabungeros ti multiple counts of murder ken serious illegal detention charges kontra kenni Ang ken kakadwa na, idi Sabado, Agosto 1.
Iti maysa nga statement nga inruar ti abogado na a ni Atty. Gabriel Villareal, imbaga ni Ang a nakasagana a sumungbat kadagiti alegasyon kontra kenkuana iti legal forum.
Tinakderan ni Ang nga inosente daytoy ken nagballaag iti testimoniya ti self-proclaimed whistleblower a ni Julie Patidongan alyas Totoy nga inladawan na nga addaan ti depekto, bukod nga interes ken awanan ti pammaneknek.
Kinuna na a naaramid ni Patidongan nga ag-level up manipud iti panagbalin na a paset ti robbery syndicate agturong iti panangipataray na ti bukod na a criminal network kas iti ilegal a sugal, kidnapping, panagkikil, ken pammutbuteng babaen iti panangusar ti resources ken koneksiyon na a saan nga ammo dagiti ngatuen wenno superior na.
Kinuna pay ni Ang, a nairaman ni Patidongan iti panagpukaw ti maysa a kalaban iti sabong idiay Manila idi naudi a paset ti napalabas a tawen, ket mabuteng daytoy a maibutaktak dagiti aramid na.
Isunga ita kuna ni Ang, pab-pabasolenna dagiti superior na nga utek iti kunana a maysa a parbo nga istorya ni alyas Totoy tapno tarayan ti pannusa kadagiti inaramid na a krimen.
Kinuna pay ni Ang, a naalilaw ti publiko babaen ti maysa a “ narungsot nga ayup nga agpam-pammarang kas naamo a karnero” kinuna na a maysa a beterano a ‘mangloloko’ ni Patidongan a makitip-tipon kadagiti biktima ti trahedya nga isuna met laeng ti akin-aramid.
Inawagan pay ni Ang a bunga ti imahinasyon iti istorya ni Patidongan nga isuna ti rumbeng a maibutaktak ket asidegen kunana a mapasamak daytoy.
Maipalagip nga immuna nga inakusaran ni Patidongan da Ang ken aktres a ni Gretchen Barretto nga adda iti likod ti maipagarop a panagpukaw dagiti sabungero, banag a pinaglibakan dagiti dua.
