Itantandudo ita ni Israeli Prime Minister Benjamin Netanyahu ti maysa a “military solution” tapno maisalakan ti mapatta-patta a 20 a nabatbati hostage ti Hamas manipud pay idi Oktubre 7, 2023.
Kinuna ti maysa nga opisyal ti Israel nga agtultuloy ti koordinasyon a idiay Estados Unidos gapo ta innayon na a saan met nga interesado iti Hamas iti aniaman a katulagan seknan iti panangwaya-waya kadagiti nabatbati pay a kautibo.
Gapo iti daitoy ket panggep ni Netanyahu a palawaen pay ti operasyon militar da idiay Gaza tapno mapuersa ti Hamas nga isubli dagiti kailian da.
Maipalagip a nagprotesta dagiti rinibu a residente ti Tel Aviv idi aldaw ti Sabado tapno kiddawen iti gobierno a gibusenen iti giera tapno maisublin dagiti kautibo.
Iti agdama ket agtultuloy latta iti kumarkaro a krisis ti panagbisin idiay Gaza a segun iti Hamas-run Gaza Health Ministry, nasuroken a 175 nga indibidwal – pakairamanan dagiti 93 nga ubbing – dagiti natnatayen gapo iti malnutrisyon.
Nupay impaganetget ti Israel nga umdas iti palpalubosan da a makastrek nga humanitarian aid, imbatad ti maysa nga international organization a daitoy ket agkurkurang latta ken agpegpeggad a makapadas metten iti panagbisin iti intero a Gaza.
