Inanunsyo ni Australian Prime Minister Anthony Albanese a bigbigenen ti Australia iti estado ti Palestine iti sumaruno a sesyon ti United Nations (UN) General Assembly inton Setyembre 2025.
Segun kenni Albanese, iti desisyon ket kalpasan a naala ti Australia dagiti kari manipud iti Palestinian Authority, pakairamanan iti demilitarisasyon, panagangay ti eleksion, ken agtultuloy a panangbigbig iti Israel iti rehiyon.
“It is humanity’s best hope,” kenuna ni Albanese, mainaig iti two-state solution para iti kinakappia idiay Middle East.
Naaramid iti waragawag kasaruno ti panagtaripnong kadagiti lider manipud idiay UK, France, New Zealand, ken Japan.
Nainget met a kinontra ti Israel iti addang ken kenuna a daytoy ket reward kadagiti terorista, kangrunaan ta agtultuloy iti opensiba daytoy kontra iti Hamas idiay Gaza.
Segun iti Hamas-run health ministry, nasurok a 61,000 nga indibidwal dagiti naipadamag a pimmusay manipud tawen 2023.
Iti sabali a bangir, dinakamat ti Palestinian Authority nga iti panangbigbig dagiti pagilian ket pammaneknek ti lumawlawa a suporta para iti karbengan dagiti Palestino nga agdesisyon.
Impasigurado pay ni Albanese a saan na nga ipaayan ti papel iti Hamas tapno pakibiangan iti Palestine.
Kabayatanna, impaganetget ti Estados Unidos a saan da a bigbigen iti estado ti Palestine ita a gundaway, gapo iti maipagarop a kinaawan ti epektibo a gobierno.
Binabalaw met ni Israeli PM Benjamin Netanyahu iti Australia ken dagiti pagilian idiay Europa iti nagbalin nga addang da ken inawagan na a “shameful.”
Iti agdama, 147 a pagilian manipud iti 193 a miembro ti UN iti nangbigbig iti estado ti Palestine nga addaan ti “permanent observer state” status iti organisasyon.#
