BR LA UNION – Inlawlawag ti Department of Health (DOH) a saan nga outbreak iti ngimmato a kaso ti hand, foot and mouth disease (HFMD) ita a tawen.
Inlawlawag ni Health spokesperson ASec. Albert Domingo, resulta daytoy iti napasayaat a reporting wenno panag-report iti kaso ti nasao a sakit.
Segun iti DOH official, kaadwan kadagiti kaso a nailista ita a tawen ket agtaltalinaed a suspected cases ken saan pay a kumpirmado babaen ti panangamiris iti laboratoryo.
Malaksid dayta, napabileg pay iti vigilance wenno panagbalin nga alisto iti eskwelaan, daycare centers ken komunidad a nakatulong tapno maingato pay iti reporting dagiti kaso a napateg iti contact tracing kadagiti posible a nakapolapol ti maysa nga infected nga indibidwal.
Impaganetget ni ASec. Domingo nga awan ti natay gaputi nasao a sakit ken masansan a maimbagan iti uneg ti 7 agingga 10 nga aldaw.
Immunan nga impadamag ti ahensiya a ngimmato ti namin-pito a daras iti kaso ti HFMD ita a tawen 2025 kumpara ti kapada a panawen idi 2024.
Iti Western Visayas ti addaan kangatuan a bilang dagiti kaso ti sakit, sumaruno iti MIMAROPA, Central Luzon, Metro Manila ken CALABARZON.
Awan pay ti bakuna kontra HFMD ngem iti panangisayangkat ti preventive measures kas ti regular a panagugas ti ima, panang-disinfect kadagiti masansan nga iggaman ken temporaryo a panang-isolate dagiti ubbing nga agsakit ket makatulong tapno saan a makaptan ken saan a maiyakar ti sakit, segun kenni ASec. Domingo.
