BR LA UNION – Umaboten iti P3 billion iti balor ti perdisyon iti infrastructure sector idiay Cordillera Administrative Region gaputi nagsasaruno a kalamidad a nagresulta iti panagregga-ay ti daga ken nalawa a panaglayos.
Iti uneg ti nasurok tallo a lawas a panagtudtudo, adu a road network iti nasao a rehiyon iti apektado, bayat a ti sumagmamano nga istruktura kas dagiti babbalay ket nadadael.
Pakaibilangan ditoy ti narsuod a sumagmamano a past ti road network a mamagsilpo iti Cordillera Administrative Region (CAR), Cagayan Valley Region, ken Central Luzon; rock netting projects idiay Benguet, ken dadduma pay a public infrastructure project.
Segun kenni Department of Public Works and Highways (DPWH) Secretary Vince Dizon, posible a lalo pay a ngumato ti nasao a balor ti perdisyon bayat nga agtultuloy iti assessment ken validation iti nagbalin nga epekto ti kalamidad.
Nupay agtultuloy pay laeng ti validation, nagkari ti sekretaryo nga umdas ti pondo para iti nabiit a rehabilitasyon dagiti nadadael nga imprastraktura.
Segun iti sekretaryo, maysa a kangrunaan a prayoridad ita ti DPWH ken national government ket panangtarimaan ken rehabilitasyon kadagiti nadadael nga imprastraktura tapno matulungan ti Cordillera a makarekober manipud iti epekto ti kalamidad.
Aganay 15 nga indibidwal ti natay iti intero a Cordillera iti naglabas a lawas gapu iti rain-induced landslides .
Siniguro pay ni Dizon a nakatutok da iti dadduma pay a rehiyon a nakailista ti infrastructure damage gapu iti nagsasaruno a kalamidad.
