Impila ni Paranaque 2nd District Representative Brian Raymund Yamsuan iti House Bill 3124 nga addaan panggep a protektaran dagiti Pilipino manipud kadagiti AI-generated deep fakes a mabalin a maaramat tapno allilawen iti publiko, dadaelen ti reputasyon, agpammarang, ken dadduma pay.
Segun ti Kongresista, panawanen a maaddaan ti natibker a linteg kontra kadagiti deep fakes.
Sagudayen ti House Bill 3214 wenno Deepfake Regulation Act iti natural a karbengan ti tunggal Pilipino a maaddaan ti bukod a langa, pakairamanan iti rupa, bagi ken boses a saan a kasapulan ti inisyal a panagparehistro para iti trademark wenno proteksyon iti copyright.
Protektaran pay ti singasing-linteg dagiti indibidual a maar-aramat ti langana nga awanan ti pammalubos babaen ti panagkiddaw nga ikkaten dagiti saan nga otorisado a content manipud iti platform a nakaipablaakanna, ken rumbeng nga ikkaten ti platform iti las-ud ti 48 nga oras manipud ti panakaawat ti napaneknekan a reklamo.
Makulong ti dua agingana lima a tawen wenno multa ti agingana P50,000 agingana P200,00 dagiti indibidual wenno platform a mapaneknekan a nagaramid, nangiwaras, wenno nagkedked a mangikkat ti deepfake content kalpasan ti valid notice.
Mamulta met dagiti online platform a saan a sumurot ti P50,000 tunggal aldaw a sagudayen ti singasing-linteg.#
