BR LA UNION – Imbitaran ti Senado ni sigud a Bicol Partylist Rep. Elizaldy Co ken sigud a House Speaker Martin Romualdez iti sumaruno a panagdengngeg seknan iti maipagarop a korapsyon iti flood control projects.
Segun kenni Senate Blue Ribbon Committee Chairman Senador Ping Lacson, patulodan da ti invitation letter da Co ken Romualdez tapno sumungbat kadagiti alegasyon a maibat-bato kadakuada.
Kinuna ti senador, nu saan a makadar-ay ni Co ket patulodan da ti subpoena, ket nu saan manen a makadar-ay, maiyiswan ti show cause order.
Imbaga ti senador a babaen iti nasao nga addang ket mapukaw ti atap ti sumagmamano a sektor, nga adda pab-paboran wenno prot-protektaran a personalidad ti komite.
Para kenni Romualdez, imbaga ni Lacson nga idalan da ti imbitasyon kenni House Speaker Faustino Dy III.
Iti agdama, segun kenni Lacson nga ur-urayen ti komite ti sumagmamano a panagbal-baliw iti kaso sakbay da nga ituding ti sumaruno a panagdengngeg.
