BR LA UNION – Pinaglibakan ni Senator Rodante Marcoleta nga agpapaay kas abogado ti agassawa a Curlee ken Sara Discaya, maisupadi iti napaliiw a tul-tulonganna iti agassawa, kasaruno iti serye ti panag-dengngeg ti Senate Blue Ribbon Committee seknan iti flood control scandal.
Iti maysa nga interview, imbaga ni Marcoleta a kuwes-kuwestyunaranna laeng iti panangusar ti restitution kas requirement iti pagserrek iti Witness Protection Program (WPP).
Segun kenni Marcoleta, kaiyarigan nga us-usaren ti Department of Justice iti restitution tapno limitaran iti mapili a maipasidong iti Witness Protection Program.
Tinakderan ti mammanday linteg a saan a kasapolan ti restitution nu agaply pay laeng ti maysa nga indibidwal ken maaddaan ti civil indemnity wenno bayad-danyos nu addan ti desisyon iti korte.
Impaganetget ni Marcoleta a ti panagpilit ti DOJ a pagbayaden dagiti personalidad a kayatna ti agbalin nga state witness ket pagtaudan ti korapsyon, agsipudta awan daytoy iti linteg.
Segun pay iti Senador, saan a ti agassawa a Discaya iti dep-depensaanna iti panangkuwestyon na iti restitution.
Nairana laeng kunana a ti agassawa a kontraktor ti immuna a nag-apply para iti WPP, ngem immunan a maipagarop nga impilit ni sigud a DOJ Sec. Jesus Crispin Remulla a rumbeng nga agisubli nga umuna dagitoy iti ‘tinakaw’ da a kuwarta, banag a saan kunana nga ipalpalubos ti linteg.
Tinakderan ti Senador a ti WPP ket rumbeng a para iti amin a kwalipikado a testigo a sinsero a tumulong iti gobiyerno.
