BR LA UNION – Nagballaag ni Senate President Pro Tempore Panfilo “Ping” Lacson kontra kadagiti inawagan na a “homegrown traitors” wenno Pilipino a nakasagana a mangilako ti pagilian kasukat ti bukod nga interes.
Segun kenni Lacson, iti nasurok 50 a tawen a panagserbi na iti gobyerno, kagudwa ditoy ti binusbos na iti intelligence work malaksid iti technical intelligence, dakkel pay a pangta iti seguridad ti pagilian dagiti indibidwal a nakasagana a mangilako ti impormasyon ken interes ti Pilipinas.
Kinuna na a gagangay a maaw-awagan daytoy kas “recruitment in place,” a mismo ti sumagmamano a Pilipino iti agbal-balin a traydor kontra iti bukod a pagilian.
Maipalagip nga iti panagdengngeg ti Commission on Appointments idi Miyerkules, Pebrero 4, nainget a kinontra ni Lacson iti singasing ni Sen. Rodante Marcoleta nga isuko ti Pilipinas iti Kalayaan Island Group (KIG).
Impaganetget ti senador, ti panangisuko iti nasao nga isla ket kaibatugan ti panangisuko saan laeng a ti maysa a teritoryo ngem ketdi paset ti Luzon wenno intero a pagilian.
Inlawlawag ni Lacson a ti Spratly Islands ket immuna a nadiskubre ken tinagikua ti Pilipino nga abogado ken adventurer a ni Tomas Cloma iti sidong ti prinsipyo ti “res nullius,” a ti maysa a daga nga awan ti akinkukua ket mabalin a tagikuaen ti siasinuman a makatakwat ken akin-sakop.
Idi agangay, insuko ni Cloma ti nasao a karbengan iti gobyerno ti Pilipinas, nga agserserbi kas maysa kadagiti legal a basaran ti pagilian iti panangtagikua ti nasao a teritoryo.
