BR LA UNION – Naaddaan manen ti nabara a sinnungbat idiay plenaryo ti Senado da Senador Panfilo Lacson ken Senador Rodante Marcoleta kalpasan a dillawen ni Marcoleta iti kaawan ti opisyal a committee report agingga ita, kasaruno ti serye ti panagdengngeg ti Senate Blue Ribbon Committee seknan kadagiti anomalya iti flood control project ditoy pagilian.
Segun kenni Lacson, naipaayanen ti inisyal a report ti tunggal senador, a ti tunggal maysa ket addaan dan ti bukod a kopya nga addaan ti watermark iti bukod da nga opisina.
Inaramid daytoy ti opisina na tapno maliklikan iti napasamak a panag-leak iti inisyal a report ti komite idi napalabas.
Buwelta met ni Marcoleta, adda ti sumagmamano a kurang iti report ti komite ni Lacson, partikular iti kaawan dagiti napateg a nagan kas iti Adrian Bersamin, a sigud a nagserbi nga Undersecretary ken mangidadaulo iti Presidential Legislative Liaison Office (PLLO).
Inukag pay ni Sen. Marcoleta iti kunana a panangi-pilit dagiti pada na a senador kas kenni Sen. Panfilo Lacson a pro-China isuna.
Iti nagbalin a sinnungbat da Lacson ken Marcoleta idi kalman iti plenaryo ti Senado, imbaga ni Marcoleta nga agpaayab ti hearing inton March 12 seknan ti isyu idiay West Philippine Sea ken iti pagpa-tinggaan ti teritoryo ti Pilipinas iti pagsusupyatan a kabaybayan.
Kabilang dagiti naimbitaran ket dagiti mangibagbagi ti National Mapping and Resource Information Authority (NAMRIA) Philippine Coast Guard, Philippine Navy, ken dadduma pay a dadakkel a personalidad kas kada sigud a Justice Antonio Carpio ken dadduma pay.
Idi saslodsoden ni Lacson ni Senate Committee on Foreign Relations Chair Erwin Tulfo, imbaga ni Tulfo a saan a makadar-ay dagiti naimbitaran nga ahensiya ken personalidad.
Gaputi dayta, impaganetget ni Lacson a ‘kum-kumpirmaren ni Marcoleta iti maysa a banag a saan pay a nakumpirma’.
