BR LA UNION – Plano ni Kalayaan Vice Mayor Maurice Philip Albayda a personal nga agturong idiay Metro Manila iti sumaruno a lawas tapno isumite ti resolution a mangkon-kondena ken kiddawen a buraen iti waragawag ni Senator Rodante Marcoleta nga isuko iti Kalayaan Island Group (KIG).
Iti eksklusibo nga interview ti Bombo Radyo, kinumpirma ni Vice Mayor Albayda nga inaprubaran “unanimously” ti amin a miyembro ti Sangguniang Bayan idiay Kalayaan ti nasao a resolution.
Inlawlawag ti lokal nga opisyal a tarigagay da a mapreserba iti dignidad ken integridad ti ili da.
Segun iti Bise Mayor, malaksid iti Commission on Appointments (CA) agsumite pay ti kopya ti resolution iti opisina ni Senate President Vicente “Tito” Sotto III.
Maipalagip nga iti kangitingitan ti panagdengngeg ti Commission on Appointments idiay Senado idi Pebrero 4, nangisawang ni Senator Marcoleta ti kontrobersiyal a waragawag nga isuko laengen iti isla agsipudta maipagarop a saan met a sakop ti exclusive economic zone (EEZ) ti Pilipinas.
Ngem iti pannakiuman ti Bombo Radyo, kinontra daytoy ni Kalayaan Vice Mayor Albayda ken impaganetget na nga awan pakainaigan iti exclusive economic zone ti territorial integrity agsipudta nagduma iti isyu ditoy.
Inlawlawag ti local official a ti EEZ ket maysa a maritime rights bayat a ti Kalayaan Island Group ket mas nakasentro iti territorial integrity.
Pinasingkedan pay ti Kalayaan local government iti declaration a bigbigen ti United Nations a nu siasino ti nakatugaw ket isuna ti akinkukua wenno claimant.
