BR LA UNION – Nasurok a P115 bilyon ti nadiskubre a nailatang para kadagiti maaw-awagan a “shadow” wenno saan a klaro a proyekto iti flood control ita a tawen 2025.
Maibasar daytoy iti panagadal ti University of the Philippines National College of Public Administration and Governance (UP-NCPAG).
Natakwatan iti panagadal, iti “shadow” flood control budget, a mangdak-dakamat kadagiti proyekto a saan a kabilang iti opisyal a Flood Management Program (FMMP) ket agtultuloy ken dakkel ti ngimmatuan na iti naglabas a tawen, manipud P81.552 bilyon idi 2022 agingga a P115.262 bilyon iti 2025.
Segun iti UP-NCPAG, rumbeng laeng a sukimaten iti dadduma pay a paset ti General Appropriations Act (GAA) nga adda pakainaiganna iti alokasyon para iti Disaster Risk Reduction and Management (DRRM).
Naipaganetget nga iti napalabas a 15 a tawen, nakaawat ti Department of Public Works and Highways (DPWH) ti pakabuklan a P7.9 trilyon — KADAKKELAN kumpara iti dadduma nga ahensya.
Iti likudan daytoy, agtaltalinaed a nakaru iti epekto dagiti kalamidad ken panaglayos ditoy pagilian.
Maibasar iti datos, iti nalawa a problema ket saan laeng a kinakurang ti pondo ngem ketdi saan nga umno a panangimaton, transparency, ken accountability.
Innayon pay ti UP-NCPAG, iti pudno a karit ita ket siguradwen a tunggal piso a mailatang tapno protektaran iti komunidad ket pudno a maiserbi kadagiti umili, a saan ketdi nga agturong iti bulsa ti sumagmamano.
Tapno masungbatan dagiti isyu, insingasing ti UP-NCPAG:
– Palawaen ti Independent Commission on Infrastructure iti imbestigasyon.
– Ipatungpal iti Executive Branch dagiti systemic reforms iti panangimaton dagiti proyekto.
– Iyakar ti Kongreso dagiti pagrebbengan iti disaster risk reduction iti maysa a dedicated agency.
– Papigsaen ti oversight agencies dagiti mekanismo ti accountability iti badyet.
Segun iti UP-NCPAG, nu agtalinaed a saan a masolbar dagiti sistemiko nga isyu, agtultuloy a makapadas ti panaglayos dagiti Pilipino, saan a gaputi kinakurang ti pondo, nudiket iti DPWH ket “MALMALMES” iti kaadu dagiti proyekto a saan a kabaelan nga ipatungpal ken ma-account a nasayaat.
