BR LA UNION – Nakasaganan iti sibubukel nga opisina ti Office of the Ombudsman para iti panangawat ken panagtugaw ti baro a dutok nga Ombudsman a ni Jesus Crispin Remulla.
Iti mismo a sango ti opisina ti Ombudsman a masarakan idiay Quezon City, makita ti maysa a dakkel a tarpaulin a nakasab-it.
Addaan daytoy ti mensahe a panangkablaaw para iti baro nga Ombudsman, kas panangipakita ti suporta ken panangawat kenkuana.
Maibasar iti impormasyon a naggapo iti Ombudsman Public Information and Media Relations Bureau, kinumpirma da a ti OMB Proper Office ket intero a nadalusan ken nasimpa.
Innayon da pay, a nakasaganan iti sibubukel nga opisina para iti pormal a panagserrek ken panagtakem ti baro a mangidaulo ti Office of the Ombudsman.
Nakatuding nga agsapata iti takem ni Remulla ita nga aldaw ti Huwebes, Oktubre 9 ket namnamaen a mangrugi a dagus nga agtrabaho inton bigat, aldaw ti Biyernes.
Ni Jesus Crispin Remulla iti agserbi a maika-pito nga Ombudsman ti Republika ng Pilipinas, kalpasan a napili ken nadutukan iti pwesto idi Martes, maika-7 ti Oktubre, tawen 2025.
Namnamaen iti panagtakem na a maka-aramid ti panagbal-baliw wenno reporma a mangpasaayat ti sistema iti Ombudsman.
