BR LA UNION – Inwaragawag ti agdama a mayor idiay siyudad ti Manila a ni Mayor Francisco ‘Isko’ Moreno Domagoso nga agtultuloy ti panagsagana para iti posibilidad a pannakapasamak wenno sumangbay a didigra.
Kasaruno dagiti mailislista a panagdayyeg ti daga wenno gingined iti naduma-duma a paset ti pagilian, inpanamnama ni Mayor Domagoso iti publiko nga aramiden da ti amin tapno maisagana ti siyudad.
Ngem aminado ti mayor a saan na a maipasiguro ti kinatalged ti tunggal maysa, nu bilang mapasamak ti maysa a napigsa a gingined.
Kinuna na a saan ngamin nga ammo nu kasatnu kapigsa ken kalawa iti epekto ti didigra a kas ti gingined nu bilang tumama ken mapasaran idiay Manila.
Maysa a mabanbantayan a mapasamak ket iti ‘The Big One’ wenno panaggaraw ti daga iti West Valley Fault a posible nga umabot iti makadidigra a 7.9 magnitude.
Maysa nga ar-aramiden da a panagsagana ket iti agtultuloy a panagibunong ti ‘vital care kits’ partikular kadagiti estudyante, pulis, empleyado ti city hall ken iti barangay, tapno mapa-adu dagiti mabalin a makatulong nga agresponde.
Iti agdama, nasurok nga 40 a ribu a ‘vital care kits’ iti imbunong ti siyudad para kadagiti residente ket target da a maibunong iti nasurok 100 a ribo.
