BR LA UNION – Nangidatag ti kaso a kriminal iti Bureau of Internal Revenue (BIR) kontra iti tallo a sigud nga opisyal ti Department of Public Works and Highways (DPWH)-Bulacan a maipagarop a karaman iti “BGC Boys” wenno Bulacan Group of Contractors, gapu iti nasurok P1.6 billion a saan a naideklara a birok ken kurang a buwis sipud idi 2020 agingga 2024.
Dagiti akusado ket pakaibilangan da sigud a District Engineer Henry Alcantara, sigud nga Assistant District Engineer Brice Ericson Hernandez, ken sigud a Construction Section Chief Jaypee Mendoza.
Segun kenni BIR Commissioner Romeo Lumagui Jr., rimwar iti lifestyle check nga aglab-labes ti kinabaknang ken materyal a sanikua dagiti tallo a sigud nga opisyal ngem saan a maiyannurot iti pudno a birok dagitoy.
Maipagarop a nadiskubre iti bilyon a pisos a tax deficiencies kalpasan a naamiris dagiti sanikua da, negosyo, ken tax returns.
Sumangsango dagiti tallo iti kaso nga adda pakainaiganna iti tax evasion, willful failure to file, ken willful failure to supply correct and accurate information iti income tax returns dagitoy.
