Pimmigsa ken nagbalinen a severe tropical storm iti mabanbantayan a bagyong “Fung-wong” (Uwan).
Naudi a nasaripatpatan iti sentro ti Severe Tropical Storm FUNG-WONG iti ruar ti Philippine Area of Responsibility (PAR) iti kaadayo nga 1,500 km Daya ti Northeastern Mindanao wenno 1,470 km Daya ti Eastern Visayas.
Kabuyog na iti maximum sustained winds a 95 km/h asideg ti tengga, gustiness nga agingga 115 km/h, ken central pressure a 990 hPa.
Agdama a direksion na iti Amianan-a-laud iti kabuntog a 10 km/h.
Maibasar iti latest tropical cyclone advisory ti PAGASA, sumrek daytoy iti PAR inton tengnga ti rabii wenno inton bigat (Nobiembre 8) ti agsapa ken mapanaganan kas “UWAN”.
Nangato met ti tyansana nga aglandfall inton Lunes (Nobiembre 10) ditoy Northern wenno idiay Central Luzon.
Mapatta-patta a napartak iti panagpigsa ti bagyo ken madanon ti typhoon category iti sumaruno a 24 nga oras ken super typhoon inton bigat ti rabii wenno bigat ti Dominggo.
Para ti land hazards, nasapa a maipasidong ti wind signals iti eastern portion ti Luzon ken dagiti probinsya idiay Samar inton malem wenno inton bigat kagiddan ti manamnama a napipigsa nga angin gapo ti umasideg a bagyo.
Ti kangatuan a wind signal para iti agdama a forecast scenario ket Wind Signal No.5.
Manamnama a mangrugi iti epekto ti bagyong UWAN iti sasaaden ti panawen inton Dominggo (Nobiembre 9), life-threatening stormy conditions iti Northern Luzon ken ti sumagmamano a paset ti Central Luzon inton Lunes (Nobiembre 10) ken Martes (Nobiembre 11).
Nangato met ti potensial ti storm surge ken panaglayos kangrunaan iti Northern Luzon ken ti Daya a kabaybayan ti Central Luzon.
