BR LA UNION – Impasigurado ti Philippine National Police (PNP) ti kinasaganada a tumulong iti panawen ti panagkasapulan gaputi posible a napigsa nga epekto ti Bagyo Uwan ditoy pagilian.
Kinunada a maipasigurado ti publiko a naka-standby da para iti evacuation and disaster response operations, nangruna kadagiti lugar a nakaro ti pannakaapektarda.
Imbilin ni Philippine National Police Chief Police Lieutenant General Jose Melencio C. Nartatez Jr. a maikabil iti ‘full alert status’ amin a unit ti PNP.
Kayatna a sawen, naka-alerto ti puwersa ti pulisya a makitinnulong kadagiti lokal nga opisyal iti panangipatungpal ti preemptive ken mandatory evacuations no kasapulan.
Partikular nga asikaswen ti Philippine National Police dagiti rehiyon iti Northern ken Central Luzon a manamnama ti napigsa a tudo ken angin a patauden ti Bagyo Uwan.
Inallokoy ti hepe ti Philippine National Police ti panagtitinnulong ti publiko iti panagsagana ken agtalinaed nga alerto kadagiti opisyal a balakad ti gobierno.
