Nakasagana ni Senate President Pro Tempore Ping Lacson a mangipaay ti personal a balakad kenni Senador Ronald “Bato” dela Rosa mainaig ti posible a warrant of arrest manipud ti International Criminal Court kontra iti senador.
Segun kenni Lacson, inawagan na ni dela Rosa tallo nga aldaw iti napalabas tapno mangidanon ti moral a suporta kas sigud a kadua ti Philippine National Police (PNP), ngem saan na sinungbatan iti awag.
Tarigagay na a balakadan ni Sen. Bato no kasano a sangwen dagiti kaso babaen iti umno a wagas, kangrunaan iti kaso ket adda iti internasional a korte.
Inrabak na a suruan na ni dela Rosa nga aglemmeng, ngem inlawlawag na metlaeng nga adda iti ima ti otoridad iti panangarestar iti senador.
Adda met iti limitasion ti parliamentary immunity no kaspangarigan agtalinaed ni dela Rosa iti Senado tapno saan a maarestar.
Nupay kasta, suportaran ti mayora dagiti senador iti waragawag ni Senate President Tito Sotto a rumbeng a raemen iti kortesiya a saan nga isayangkat iti panagarestar iti uneg ti Senado.
Kabayatanna, nagkiddaw ni Senate President Vicente Tito” Sotto III ti legal nga opinyon maipanggep iti rumbeng nga addang ti Senado no kaspangarigan matuloy iti damag a posible nga ipaarestar ti International Criminal Court (ICC) ni dela Rosa.
Segun kenni Sotto, awan pay ti kumpirmado nga impormasion na no adda ti warrant of arrest ken agingga ita ket saan na pay a nakasarita iti senador.
Pinili na iti agkiddaw ti balakad kadagiti eksperto kaysa mangipaay ti bukod nga opinyon.
Siguden nga imbaga ni Sotto a saan nga itulok ti Senado iti panangarestar kenni Dela Rosa wenno iti uray asino a senador bayat nga adda iti uneg ti Senado, kangrunaan no madama iti sesion.
Kenunana, saan a panangisakit daytoy kenni dela Rosa no di ket panangipateg iti Senado kas institusion.###
