BR LA UNION – Immapela ni Manila Archbishop Cardinal Jose Advincula iti militar ken pulisya nga agtalinaed a napudno iti sinapataanda a pagrebbengan ken kadagiti umili kalpasan ti panangibagana a ti pagilian ket agdama a sumangsango iti nauneg a moral ken espiritual a krisis gapu iti isyu ti kurapsyon ken kinakurang ti panagtalek kadagiti institusyon.
Segun kenni Advincula, nasken a tungpalen dagiti umili ti “rule of law” ken laksiden ti anyaman a panawagan para kadagiti addang a maikontra iti konstitusyon.
Kinuna ni Advincula a rumbeng a maipamaysa ti kinapudno ti tunggal umili iti pagilian ken demokratiko a prinsipiyo, saan nga iti aniaman a personalidad wenno bukod nga interes.
Inallokoy na pay ti publiko nga agbalin a nasirib, manag-sukimat ken naannad iti panagawat ken panagi-bingay ti impormasyon.
Iti udi, nagpanawagan ni Cardinal Advincula iti amin anga amirisen ti konsensya, baliwan ti panagbiag ken agbiag a maiyannurot iti pagayatan ti Diyos.
