Naselioan ken awan taona iti condominium unit ni sigud a Congressman Zaldy Co idiay Bonifacio Global City (BGC), Taguig, idi inserbi dagiti polis iti arrest warrant idi kalman, Nobiembre 22.
Nagturong dagiti personnel manipud ti Southern Police District ken Taguig Police Station iti nasao a condo ti manmanday-linteg tapno iserbi iti warrant, ngem segun kadagiti caretakers, dandani makabulanen a selyado iti unit.
Awan met ti simmango a kabagian wenno siasinoman idi nagtuktok dagiti autoridad iti ridaw ti condo unit.
Malagip nga immunan a naipaulog iti warrant of arrest ti sigud a mammanday-linteg ken dadduma pay, a maipagarup a nakaawat ti dakkel a kantidad ti kickbacks manipud kadagiti flood control projects – banag a pinaglibakan ni Co.
Dinakamat ni Interior ken Local Government Secretary Jonvic Remulla a mapanda kadagiti address dagiti balay ni Co iti panangiserbi ti arrest warrant, ngem no pudno nga adda iti ballasiw-taaw isuna ket kiddawenda iti International Criminal Police Organization (Interpol) a mangipaulog ti pakaammo para iti pannakaarestar ni Co ken panaka-kansela ti pasaporte babaen ti Department of Foreign Affairs (DFA).#
