Nangipaay ni United States President Donald Trump ti deadline kenni Ukraine President Volodymyr Zelenskyy agingga Nobiembre 27, wenno ti Thanksgiving Day idiay Amerika, tapno awaten iti kontrobersial a 28-point peace plan.
Inlawlawag ni Trump a daytoy iti “final offer” wenno maudi a diaya ken namnamaen na a malpasen ti gubat iti nagbaetan ti Ukraine ken Russia.
Nangipeksa ti panagdanag dagiti lider manipud Europa, Canada, ken Japan seknan iti maisingsingasing a 28-point peace plan ti Estados Unidos, kangrunaan iti maipagarup a panagbalbaliw ti teritorio wenno dagiti beddeng, ken ti limitasion iti bilang dagiti puersa-armada ti Ukraine, uray no iti nasao a plano ket naglaon kadagiti elemento a “napateg para iti nakailintegan ken agnanayon a kinakappia.”
Nakatuding nga agtaripnong dagiti opisial ti seguridad manipud Britain, France, Germany, US, ken Ukraine idiay Geneva, Switzerland ita nga aldaw tapno talantanen iti nasao a saritaan.
Nangipaay ti waragawag ni Zelenskyy iti social media a kasapulan iti kinakappia, ken ipateg da dagiti panagregget ni Trump ken ti grupo nga addaan panggep nga isubli iti seguridad idiay Europa.
Kenuna met dagiti opisial ti Estados Unido iti kaalyadoda iti North Atlantic Treaty Organization (NATO) a namnamaen da nga umanamong ni Ukrianian President Volodymyr Zelenskyy iti katulagan kadagiti sumaganad nga aldaw ken nagballaag a sanguen ti Kyiv iti nakaro a sitwasion no agkedked-da.#
