BR LA UNION – Nagballaag ti Philippine Institute of Volcanology and Seismology (PHIVOLCS) iti publiko seknan iti posible a lahar flow gaputi napigsa a panagtudo a gapwanan ti dakes a panawen.
Segun kenni Resident Volcanologist for Mayon Volcano Deborah Fernandez iti interview ti Bombo Radyo Legazpi, posible a makapadas ti Bicol Region ti panagtudtudo kas epekto ti bagyo Verbena ken shearline.
Innayon na pay a ti Bulkang Mayon ket posible a mang-generate ti lahar flow.
Napakdaaran dagiti residente kadagiti lugar idiay Miisi, Binaan, Mabinit, Buyuan, Anoling, Matanag, Bonga, ken Basud Channels nga agannad ken agridam.
Kinuna na a posible a maapektaran ti ili idiay Guinobatan, a masansan a malayos tunggal adda napigsa a panagtudo nangruna idiay Masarawag ken Maninila Channels.
Iti agdama, awan pay ti makita a potensyal a lahar flow, ngem posible iti rockfall events ken dadduma pay a deposito manipud Bulkan Mayon.
Nupay agtaltalinaed iti Alert Level 1 ti bulkan, naballaagan ti publiko iti posibilidad a panagtinnag dagiti bato a kadak-dakkel ti balay.
Saan met a maipa-igid ti posibilidad a phreatic eruptions a mapakuyugan ti dapo nangruna ita a panagtutudo.
Nagpakdaar pay ti opisyal iti amin a liklikan ti umasideg iti 6-kilometer permanent danger zone ken iti karayan ken agbalin a naridam iti posible a lahar flow iti lugar.
