BR LA UNION – Imbinglay ni House Majority Leader ken Ilocos Norte Rep. Sandro Marcos iti kopya ti surat kenkuana ti Independent Commission for Infrastructure (ICI) kas sungbat iti alegasyon ni sigud a Rep. Elizaldy Co.
Iti nasao a surat, impaganetget ni Marcos nga awan ti ilem-lemmeng na ken nakasagana a sumango iti anyaman nga imbestigasyon seknan iti kontrobersyal a proyekto.
Kinuna na a nakasagana a mapan agpalawag iti komisyon ken makitinnulong iti isay-sayangkat da nga imbestigasyon tapno maprotektaran iti integridad ti Kongreso.
Maipalagip a ni Co ket kabilang kadagiti personalidad ken mammanday linteg a mairam-raman iti isyu ti “ghost projects” iti flood-control ken dadduma pay nga infrastructure programs.
Ti Independent Commission for Infrastructure (ICI) ket nabukel tapno mangisayangkat ti nainget a panagsukimat kadagiti anomalya dagiti proyekto a pinonduan ti gobyerno.
Innayon ni Marcos, a ti pannakisango na iti ICI ket pammaneknek ti panang-takder na iti transparency ken responsibilidad kas opisyal ti gobyerno.
Nakatuding nga ituloy ti ICI iti serye ti panagdengngeg ken manamnama a paayaban da ni Marcos ken dadduma pay a nadakamat a personalidad tapno mangipaay ti statement.
