Nakaibulsa ken nagnumar ni sigud nga Ako Bicol Party-List Representative Zaldy Co ti aganay P10.41 billion a kas kickback manipud kadagiti proyekto ti gobierno, maibasar iti report ti Anti-Money Laundering Council (AMLC).
Ti nasao a gatad ket manipud 2023 agingga tawen 2025, aginggana nagikkat kas manmanday-linteg.
Rumrumuar met iti financial record ti AMLC a nakapastrek isuna ti agingga P3.9 billion kadagiti accounts na manipud 2021 aginggana 2025.
Ti nasao a gatad ket adayo a nangatngato no idilig iti sueldona iti Kongreso ken ti urnong a sakbay a simrek iti Kongreso.
Maibasar iti rekord ti konseho, nasurok dua a gasut dagiti bank accounts ni Zaldy Co iti addan iti sidong ti freeze order.
Iti agdama, dagiti sanikuana a nakapasidong ti freeze order ket dagiti 205 bank accounts, 12 insurance policies, dua nga AW139 helicopters a napattapatta nga aggatad ti P1.8 billion, ken ti maysa a Gulfstream G350 jet nga agbalor iti nasurok P2 billion.
Sumagmamano kadagiti sanikua ken accounts ti sigud a manmanday-linteg a na-freeze ket dagiti joint accounts iti kontrobersial a Sunwest Construction and Development Corp.#
