Impadanon ni sigud a Senador Antonio “Sonny” Trillanes IV nga imbabawi nan dagiti kaso a nakatuding na nga ipila kadagiti bimmaliktad a sigud a bagmen ni Zaldy Co.
Maipalagip nga uppat kadagiti 18 a nagpaam-ammo kas sigud a marines a bagmen ni Zaldy Co ket bimmaliktad ken imbabawin iti immun-una da nga affidavits ken alegasyon kontra kada Trillanes ken dadduma pay a personalidad, agramanen ti International Criminal Court (ICC).
Segun kenni Trillanes, kas sigud a soldado ket maawatan ken makipamaysa isuna iti kasasaad dagitoy a kunana ket nagundawayan laeng gapo iti kaawan ti pagbiagan dagiti tattao nga adda iti dakes a panggep da ti politika.
Mangnamnama isuna nga agserbi kas adal iti naglabasan da tapno saanen a maulit pay, kasta met iti panagtalek na nga adda pay dagiti sabali a sigud a soldado nga agingga ita ket gungundawayan latta dagiti kapada a grupo.
Impaganetget pay ni Trillanes a ti desisyon na ket panangisakit ti pada a soldado nga inton agangay ket makita metlaeng ti dadduma iti pudno a motibo ti likudan dagiti panangallilaw.
