Impaganetget ni Senador Sherwin Gatchalian a saan a “realistic” wenno adayo iti kinapudno iti intuding ti Department of Trade and Industry (DTI) a P500 a pang-Noche Buena para ti pamilya a buklen ti uppat a miembro.
Kinunana a nu pagsasaritaan ti Noche Buena ket nangatngato pay nga amang ngem P500 ti kasapulan para ti nasao a panaghanda. Inyarig na met a nu ti maysa a pamilya ket addaan ti lima a miembro, mapan laeng a tig-P100 ti magastar ti tunggal maysa.
Inlawlawag ti senador a nu gumatang ti karne wenno meat products a paghanda ket sigurado a nangatngato pay ngem P100 ti presyo dagitoy.
Babaen ti Administrayon Marcos ket agtaltalinaed a nababa ti inflation ken saan a lumagpas ti 2% nga isu’t rason isu nga agtaltalinaed met a nababa ken saan a nagpangato ti presyo iti bigas ken dadduma pay a taraon.
Innayon na pay a kalikagum ita ti panangipababa ti implasyon gapuanan ta nu nangato ti presyo ket makanayon pay daitoy a sakit ti bulsa dagiti Pilipino.
