Impadamag ni Presidente Ferdinand Marcos Jr. a nairekomendan ti Office of the Ombudsman iti panangipila ti kaso a kriminal kontra kadagiti karaman iti maipagarup a ghost flood control project idiay Kulaman, Jose Abad Santos, Davao Occidental nga aggatad ti aganay 100 million pesos.
Iti report ti Presidente, kenunana a nakita ti Ombudsman nga addaan ti basaran tapno pilaan ti malversation through falsification ken panaglabsing iti Section 3(e) ti Anti-Graft and Corrupt Practices Act dagiti sumagmamano a personalidad manipud ti St. Timothy Construction Corporation ken sumagmamano nga opisial ti DPWH a mapapati a nangproseso kadagiti peke a dokumento tapno mairuar iti pondo ti proyekto uray awan pay ti aniaman a kontraksion iti napasamak.
Nakalanad iti reklamo dagiti nagan manipud iti St. Timothy Construction, karaman da Cezarah Rowena Discaya ken Maria Roma Angeline Remando, pati dagiti sumagmamano a DPWH personnel a maipagarup a nangpapartak iti panagaprobar dagiti dokumento a nagresulta iti panagrelease ti sibubukel a pondo.#
