BR LA UNION – Nangibunong ti Philippine Coast Guard ti “Bagong Pilipinas goodies” iti 100 a mangngalap nga agnanaed idiay probinsiya ti Zambales.
Dagiti nasao a “goodies” ke naglaun iti kangrunaan a kasapolan a kas ti bagas, oatmeal, ken dadduma pay a de-lata a taraon.
Ranta ti nasao nga addang nga ipaayan ti suporta ken tulong dagiti mangngalap, nangruna ita a panawen ti paskua.
Kas pangnayun ti ragsak ken panagrambak iti okasyon, nagsuot ti ‘Santa hat’ dagiti kameng ti Philippine Coast Guard.
Wagas da metten daytoy tapno iparikna iti espiritu ti paskua ken mangliwliwa kadagiti mangngalap ken pamilya dagitoy.
Malaksid dayta, iti Coast Guard Sub-Station San Antonio ket aktibo pay a nakipaset iti panangipaay ti tulong kadagiti mangngalap nga adda iti kabaybayan idiay San Antonio.
Ti nasao nga aktibidad ket maiyannurot iti direkta a bilin ni Presidente Ferdinand Marcos Jr. a personal a siguradwen ti pagimbagan dagiti mangngalap iti intero a pagilian.
