Pinasingkedan dagiti otoridad nga agtunos iti initial findings ti National Bureau of Investigation (NBI) iti viral dashcam footage idiay Kennon Road, Benguet a nakakitaan kenni sigud a Department of Public Works and Highways (DPWH) Undersecretary Maria Catalina Cabral a nakatugaw iti kalsada sakbay iti pannakatay na idi Disiembre 18.
Napaneknekan met ti Philippine National Police (PNP) ken Department of the Interior and Local Government (DILG) Secretary Jonvic Remulla nga iti selfie photo ti driver ni Cabral ket pudno ken agpada iti tao nga adda iti video.
Segun kenni PNP acting chief Police Lt. Gen. Jose Melencio Nartatez Jr., nakapamaysan ti PNP iti panagimbestiga no ania iti pudno a napasamak iti sigud DPWH official ken tumultulong da iti panagkalap dagiti ebidensia nga adda pakainaigan na kenni Cabral a posible a makatulong iti imbestigasion kadagiti maanomalya flood control projects.
Naisayangkat met iti crime scene reconstruction iti Kennon Road, ken binirok ti NBI iti hotel ni Cabral a nakakumpiskaran dagiti personal a gamit ken dokumentona.
Kabayatanna, iti bangkay ni Cabral ket agdama nga adda iti memorial chapel idiay Quezon City.#
