Dakkel iti pammati ti Department of Interior and Local Government (DILG) a nangisayangkat pay nga umuna ti surveillance ni sigud a Department of Public Works and Highways (DPWH) Undersecretary Catalina Cabral iti lugar sakbay a limmagto iti nauneg a rangkis idiay Tuba, Benguet.
Segun kenni DILG Secretary Jonvic Remulla, immuna a pinasardeng ni Cabral iti driverna iti lugar sakbay a nagturong idiay Baguio City ken nagsubli iti kapada a lokasion.
Immuna met a sinita isuda ti pulis gapu ta maiparit iti panagparada iti lugar isu a pimmanaw da metlang.
Para kenni Remulla, nakita ni Cabral nga agbalin a nakaro iti pannakadangran a masagrapna no matnag iti lugar a katupag ti pasdek nga addaan ti 10 a kadsaaran.
Maipalagip a nagikkat iti puesto ni Cabral idi Setyembre kalpasan iti imbestigasion ti Kongreso gapo iti maipagarup nga anomalya iti pondo dagiti flood control projects, karaman iti akusasion nga immawat ti kickbacks dagiti mammanday-linteg ken sumagmamano nga opisial ti gobierno.#
