Makipampamaysa ni Presidente Ferdinand R. Marcos Jr. iti umili a Pilipino iti panagrambak ti Paskua kagiddan ti panangipadanon na ti mensahe iti panangipateg ken ti panagbalin a managparabor.
Iti Christmas message ti Presidente ket kinablaawan na amin a Pilipino iti panagrambak ti pannakaipasngay ni Hesukristo, a kinunana ket agserserbi a simbolo ti namnama, panagayat, ken kinasayaat ti maysa ken maysa.
Idawdawat ni Presidente Marcos nga agbalin a naragsak, nakapia, ken adda pakaipapanan ti Pasko ti tunggal pamilya ken komunidad ti intero a pagilian.
Nagpanawagan met isuna iti publiko a saan a liplipatan dagiti kailian nga agkasapulan, nangruna dagiti marigrigat, biktima ti didigra, ken pinaregta ti am-amin a mangibinglay ti tulong iti madanon ti kabaelan da.
Ikarkararagan na para ti am-amin nga agpanuray ti ayat, kinasayaat, ken panagkaykaysa ti tunggal pagtaengan ken ditoy pagilian – saan laeng ita a Paskua nu di ket para payen kadagiti sumaganad a tawen.
