Nangipila ni Senador Erwin Tulfo iti maysa a singasing-linteg nga addaan panggep a pababaen ti value-added tax (VAT) manipud 12% aginggana ti 10% kas sungbat iti agtultuloy a panagngato ti presio dagiti tagilako ken serbisio iti pagilian.
Iti naipila a Senate Bill No. 1552 wenno ti singasing a “VAT Reduction Act of 2025”, impatalged ni Tulfo nga iti pannakakissay ti VAT ket direkta a makatulong iti panangpalag-an iti dadagsen dagiti Pilipino iti nangina wenno nangato a presio dagiti tagilako, kasta met iti panangpapigsa iti pannakabalinda a gumatang.
Innayon ti Senador nga imbes nga agdepende dagiti Pilipino iti pinansial a tulong ti gobierno a mabalin a masayang gapu iti posible a panagkunniber, nasaysayaat no agtalinaed ti kuarta iti bulsa dagiti tattao. Mabalin met a makaallukoy dagiti nangatngato a panaggastos dagiti consumer, a posible a manguturong iti panagrang-ay ti ekonomiya.
Iti daytoy a wagas, mabalin a makabawi iti gobierno iti posible a kinakurang ti kita bayat a lumawlawa iti aktibidad pang-ekonomia.
Dinakamat met ni Tulfo nga iti Pilipinas ken Indonesia ket addaan ti kangatuan a VAT iti Southeast Asia nga agpada nga adda iti 12%, bayat a dagiti dadduma a kabangibang a pagilian ket addaan ti VAT manipud 7% aginggana 10% laeng.
Ti VAT reduction bill ket saan laeng a makatulong kadagiti ordinario nga umili no di ket pasayaatenna pay ti panagbalin nga kompetitibo ti pagilian iti rehion.
Kabayatanna, nakalanad iti pannakailawlawag ti singasing nga iti pannakakissay ti VAT ket maitunos iti probision ti Konstitusion a mangikeddeng ti maysa a progresibo a sistema ti panagbuis a mangitantandudo ti hustisia ken patas a komunidad.
Ti probision ket mangted ti bileg iti Presidente, babaen ti rekomendasion ti Secretary of Finance, a temporario a mangisubli iti VAT ti 12% no kaspangarigan makita ti Development Budget Coordination Committee (DBCC) a limmagpas iti nakatuding a limitasion iti national deposit.
Maipalagip nga immunan a nangipila ni Cavite 4th District Rep. Elpidio “Kiko” Barzaga Jr. ti naisina a bill a mangikagkagumaan ti naan-anay a pannakaikkat ti VAT ken mangpababa iti rate daytoy ti 0%.###
