BR LA UNION – Nagpanawagan ni Presidente Ferdinand Marcos Jr. iti Kongreso a dagus nga amyendaran iti Electric Power Industry Reform Act (EPIRA) tapno naan-anayen a maikkat ti system loss charge nga ipaspasa kadagiti consumer kas paset iti binulan a singir iti kuryente.
Iti maikalima nga State of the Nation Address (SONA) na idi kalman, Lunes, imbaga ti Presidente nga ammo na iti arungaing ti publiko seknan iti nangato a singir iti kuryente ditoy pagilian isunga panawenen kunana tapno ikkaten ti ‘system loss’ a maipab-pabaklay kadagiti consumer, malaksid nga adda pay maipat-patong a value added tax.
Kinuna ti Presidente, saan met a basol ti konsyumer dagiti maaw-awagan a system loss, isunga saan nga umno kunana a dagiti consumer ti agbayad.
Mainaig ti daytoy, inallokoy ti Presidente iti Kongreso a paspasan nga ipasa iti “Sariling Kuryente Act” tapno agbalin a nalaka iti panag-pakonektar ti solar panels ken battery storage systems kadagiti babbalay.
Gaputi dayta, immandar na iti dagus a panang-amendar iti EPIRA ken iparit iti charging systems loss kontra kadagiti consumers argaman ti value-added tax a maitutu-on iti baybayadan nga electric bill.
Iti EPIRA wenno Republic Act No. 9136 ket linteg a nangreporma iti industriya ti kuryente idi 2001.
Iti sidong ti agdama a probisyon daytoy, napalubosan dagiti distribution utility nga ipabaklay kadagiti consumer iti paset ti system loss a gapwanan ti technical losses ken dadduma pay a non-technical losses, kas ti illegal connection ken panagtakaw ti kuryente.
Malaksid iti panang-amyendar iti EPIRA, inallokoy pay ni PBBM iti Kongreso nga ipasa ti gakat a “Sariling Kuryente” Act, a tarigagay na nga aramiden a nalaklaka iti panag-install ti rooftop solar panels ken battery storage systems iti pagtaengan.
Segun iti Chief Executive, makatulong ti gakat tapno ad-adu dagiti alternatibo a paglaan dagiti Pilipino ti kuryente ken makissayan iti gastos ti singir iti kuryente.
