Manamnama a ngumato iti singir ti kuryente kadagiti konsyumer ti Luzon, Visayas, ken Mindanao gapo iti mapapati a panagngato iti transmission charge ita a bulan ti Agosto.
Segun ti National Grid Corporation of the Philippines wenno NGCP, ngimmato ti 22.22% iti transmission rate para ti July 2026 billing period, manipud iti P1.4367 agturong iti P1.7560 per kilowatt-hour.
Kangrunaan a rason na ket ti 30.85% a panagngato iti ancillary services charges, manipud iti P0.7941 a nagbalin nga P1.0391 per kilowatt-hour.
Inlawlawag iti NGCP nga awan iti biruk da kadagiti ancillary services agsipud ta direkta a maipabaklay ti bayad kadagiti service providers ken dadduma pay a maseknan nga entidad.
Ti transmission charge ket bayad iti panangipatulod iti kuryente manipud kadagiti power suppliers agturong ti distribution system.
