Tarigagay nga imbestigaran ni Senate President Pro Tempore Sherwin Gatchalian dagiti serye ti red ken yellow alerts ti National Grid Corporation of the Philippines (NGCP) kasaruno ti nalawa a pannakapukaw ti kuryente iti Luzon ken Visayas a nakaapektar iti minilyon a consumers.
Iti indatag a Senate Resolution No. 425, kiniddaw ni Gatchalian iti panangisayangkat ti nainget nga imbestigasion tapno maamwan iti pudno nga estado ti suplay ti kuryente iti pagilian, masukimat iti panagbalin a mapangnamnamaan ti power grid ken mapasungbat dagiti sektor a posible nga adda ti panagkurang iti napasamak nga power interruption.
Segun iti senador, napateg a maamwan no sumursurot dagiti power generation companies iti naikeddeng nga alagaden ti industriya ken no umdas dagiti addang ti gobierno tapno maliklikan iti nalawa a pannakupaw manen ti kuryente.
Impaganetget met ni Gatchalian a mabalin a kumaro pay iti kinakurang iti suplay ti kuryente gapu iti manamnama a panagkaro ti epekto ti El Niño kadagiti sumaruno a bulan.
Maipalagip nga adda iti sidong ti red ken yellow alerts iti Luzon ken Visayas grids iti nadumaduma a gundaway kadagiti napalabas a lawas, bayat a mapatta-patta nga adda iti 2.1 million consumers iti naapektaran ti pannakapukaw ti kuryente idi Mayo 13.
Iti biang ti NGCP, impaganetget daytoy a mabalin da laeng nga agtransmit ti kuryente no adda ti umdas a supply nga agtataud kadagiti power generation companies.
Gapu ti daytoy, manamnama nga ipamaysa ti Senado iti panangammo no kinakurang iti power supply, problema iti transmission system, wenno dadduma pay a banag iti nagtaudan dagiti napalabas a power outages iti pagilian.###
