Pinalawa ti Bureau of Internal Revenue (BIR) iti listaan dagiti agas a saan a sakupen ti value-added tax (VAT), a dumanon itan ti 2,263.
Maitunos daytoy iti direktiba ni Presidente Ferdinand R. Marcos Jr. nga aramiden a makabael ken accessible iti healthcare para kadagiti amin a Pilipino.
Maibasar iti Revenue Memorandum Circular No. 27-2026, nga inendorso ti Food and Drug Administration (FDA) ti Department of Health, karaman kadagiti VAT-exempt medicines dagiti 702 cancer drugs, 535 hypertension medicines, 327 diabetes medicines, 300 mental health medicines, 171 nga agas para iti high cholesterol, 152 kidney disease treatments, ken 76 tuberculosis medicines.
Naipatungpal ti sirkular babaen ti TRAIN Law (Republic Act No. 10963) ken CREATE Act (Republic Act No. 11534). Segun kenni BIR Commissioner Charlito Martin R. Mendoza, pinapartak ti ahensia iti panangrepaso ken panangaprobar kadagiti mekanismo tapno masigurado ti dagus a pannakaipatungpal dagiti benepisio para kadagiti Pilipino.
Iti sidong ti liderato ni Finance Secretary Frederick D. Go, agtultuloy ti panagtitinnulong dagiti attached agencies tapno matungpal dagitoy nga addang.
Epektibo a dagus ti sirkular ken agtalinaed agingga iti kanayonan nga update manipud iti FDA.###
