BR LA UNION – Nangidatag ti reklamo nga obstruction of justice iti Philippine National Police-Criminal Investigation and Detection Group (PNP-CIDG) kontra kenni Senador Robin Padilla ken dadduma pay nga indibidwal mainaig iti maipagarop a timmulong iti panaglibas ni Senador Ronald “Bato” Dela Rosa.
Kinumpirma ni Prosecutor General Richard Fadullon a naidatag ti reklamo idiay Department of Justice (DOJ) sakbay ti alas-5 ti malem ti Huwebes, Mayo 28, 2026.
Immuna nga inyanunsyo ti CIDG idi Miyerkules iti plano a panangidatag ti kaso kontra kenni Padilla ken daddumna pay a personalidad gapu iti maipagarop a panangtulong kenni Dela Rosa a liklikdan dagiti otoridad.
Nainget met a pinaglibakan ni Padilla iti alegasyon. Segun iti senador, saan na a tinulungan ni Dela Rosa nga aglibas ngem ketdi nakigiddan ken naglugan iti behikulo na a rimwar idiay Senado idi parbangon ti Mayo 14 .
Kabayatanna, imbaga ti CIDG nga adda pakainaigan iti insidente ti pammaltog idiay Senado ken ti maipagarop a panaglibas ni Dela Rosa.
Ni Dela Rosa ket sumangsango iti warrant of arrest seknan iti alegasyon a panagbalinna nga indirect co-perpetrator iti kaso a crimes against humanity nga adda pakainaiganna iti serye dagiti pammapatay manipud Hulyo 3, 2016 agingga Abril 2018, a nakatayan ti saan a bumaba iti 32 a tattao.
Maipalagip a ginandat dagiti otoridad nga iselbi iti warrant kontra kenni Dela Rosa idi Mayo 11 a nagresulta iti kinnamat iti uneg ti Senado.
Idi agangay ket naipasidong iti protective custody ti Senado sakbay a rimwar iti senate building idi Mayo 14.
Binilin ni Justice Secretary Fredderick Vida dagiti law enforcement agency nga arestaren ni Dela Rosa, nga inawaganna kas “fugitive from justice.” Inallokoy na pay dagiti senador a boluntaryo nga isuko ni dela Rosa kadagiti otoridad.
