BR LA UNION – Nasurok a ₱114.5-M a balor ti illegal drugs iti nakumpiskar ti Bureau of Customs – Ninoy Aquino International Airport (BOC-NAIA) iti pannakitinnulong ti Philippine Drug Enforcement Agency (PDEA) ken NAIA Inter-Agency Drug Interdiction Task Group (NAIA-IADITG) idi Enero 8, 2026.
Ti nasao a shipment a naggapo idiay Congo ket naideklara a malachite stones ngem naduktalan nga illegal a droga kalpasan a naipasidong iti X-ray inspection.
Rimwar iti naisayangkat nga eksaminasyon a dagiti uppat (4) a na-intercept a pakete a maipagarop a naglaun ti illegal drugs ket agdagsen iti 4,320 grams; 3,622 grams; 4,599 grams; ken 4,307 grams wenno agdagsen amin ti 16,848 grams.
Dagiti nakumpiskar nga items ken tallo nga indibiduwal ket pormalen a nai-turnover iti PDEA para iti proper disposition ken imbestigasyon.
Dagiti tallo a suspek ket sumango iti kaso a panaglabsing iti Republic Act No. 9165 wenno Comprehensive Dangerous Drugs Act of 2002 ken Republic Act No. 10863, otherwise known as the Customs Modernization and Tariff Act.
Naipatungpal ti operasyon maiyannurot iti direktiba ni President Ferdinand R. Marcos Jr. a papigsaen ti border protection ken saan nga ipalubos a sumrek dagiti illegal drugs ditoy pagilian ken paset metten iti whole-of-nation approach ti gobyerno iti pananglaban ti transnational crimes.
