BR LA UNION – Inyuswat ti United States Postal Service (USPS) ti maysa a pakalaglagipan a selyo a mangpadayaw iti boxing legend a ni Muhammad Ali iti ilina idiay Louisville, Kentucky.
Tampok ti selyo ti ladawan ni Ali iti kangitingitan ti karerana kas boksingero.
Segun iti USPS, 22 milyon a selyo ti nayimprenta, a tunggal maysa ket addaan ti ladawan ni Ali manipud iti retrato ti Associated Press idi 1974, a mangipakpakita kadagiti dakulapna a naipangato iti fighting stance.
Nakadkadlaw met ti apelyido nga “ALI” a naisurat iti napuskol a nangisit ken nalabbaga a letra.
Indaulwan ti beterano a broadcaster a ni Bob Costas ti unveiling ceremony ket kinunana a ti selyo ket iyanninawna ti agnanayon nga impluensiya ni Ali iti siyudad a dimmakkelanna.
Karaman iti commemorative release ti maysa nga stamp sheet nga addaan ti naisina a ladawan ni Ali a nakasuot iti pinstripe a terno, kas panangbigbig iti akemna kas maysa nga aktibista ken humanitarian.
Pimmusay ni Ali idi 2016 iti edad a 74 gaputi sinagaba na a Parkinson’s disease.
Paga-ammo kas “The Greatest,” adu ti naawat ni Ali a pammadayaw a pakairamanan ti balitok a medalya ti Olimpiyada idi 1960, United Nations Messenger of Peace Award idi 1998, ken Presidential Medal of Freedom idi 2005.
