Binabalaw ni Senador Erwin Tulfo iti panagkondena ti Chinese Embassy kadagiti waragawag ti sumagmamano nga opisial ti Pilipinas manaig iti isyu ti West Philippine Sea.
Segun kenni Tulfo, awan iti karbengan ti Chinese Embassy a dillawen iti waragawag dagiti opisial ti pagilian kontra iti maipagarup a panangtagikua ti China iti teritoryo ti Pilipinas.
Impaganetget na a saan a maawat dagiti opisial ti embahada no kasano nga agtrabaho iti demokrasya iti pagilian, ken mabalin da a pumanaw iti aniaman nga oras.
Adda iti konstitusion ti Pilipinas iti freedom of speech isu a nasken laeng a raemen dagiti ganggannnaet.
Innayon na pay ng awan ti kastuy a kinawaya iti China gapu ta maibalbalud dagiti kritiko ken patpatalnaen ti media.
Nagtaud iti isyu kalpasan nga imbaga ni (Chinese Embassy Deputy Spokesperson Guo Wei) a saan a lisensya iti freedom of speech tapno dadaelen iti lider ti China, partukal iti maysa nga internet post ni Philippine Coast Guard spokesperson Commodore Jay Tarriela a mangipakpakita ti AI-generated video ni Chinese President Xi Jinping.
Impaganetget daytoy a no tarigagay dagiti opisial ti China iti respeto dagiti Pilpino, rumbeng a raemen da iti konstitusion ken bigbigen a saan da a kukua iti pagilian.###
