Maaddaan ti multi-day air exercise iti puersa a militar ti Estados Unidos idiay Middle East bayat a pappapigsaen iti presensia daytoy iti rehion gapu ti kumarkaro a tension idiay Iran.
Segun ti US Central Command, panggep dagiti drills nga ipakita a kabaelan dagiti piloto a mangisayangkat ti combat sorties a natalged, eksakto, ken nasaayat a makikoordinar kadua dagiti kaalyado.
Dumteng iti rehion ti USS Abraham Lincoln carrier strike group, kasaruno ti pangta ni Presidente Donald Trump mainaig iti “armada” nga agturong idiay Iran ken posibilidad ti aksion militar kontra iti rehimen a mangipatpatungpal ti naranggas a crackdown kadagiti anti-government protesters.
Nainget met iti retorika ti Iran a nagpakdaar nga aniaman a panagraut ket sumango iti nakaro a panangibales a mabalin a mang-destabilize iti sibubukel a rehion.
Segun ti Central Command (CENTCOM), maisayangkat dagiti drills babaen ti pammalubos dagiti host countries ken makikoordinar kadagiti civil ken military aviation authorities, naipasigurado ti kinatalged, umno nga operasion, ken respeto iti soberanya.
Sumagmamano a kaalyado a pagilian kas ti Saudi Arabia ken United Arab Emirates ket nagpakdaar a saan da a palubusan iti panangusar ti airspace-da para iti aniaman nga aksion a maikontra iti Iran.###
