BR LA UNION – Marambakan ita nga aldaw, Enero 29, 2026 ti kaunaan a PNP Day iti intero a pagilian.
Addaan daytoy ti tema a “Serbisyong Nararamdaman, Kapulisang Maaasahan”.
Iti biang ti La Union Police Provincial Office (LUPPO), padayawanna ti amin a miyembro ti pulisiya a mangipat-patungpal a naimbag ti mandato da nga agserbi ken protektaran dagiti umili manipud kadagiti dakes nga aramid, elemento, ken pagpeggadan ti biag ti tao.
Maysa daytoy a naisang-sangayan nga aldaw para iti intero nga organisasyon tapno bigbigen dagiti outstanding officers, personnel ken stakeholders nga addaan ti epektibo a serbisyo, liderato ken panangipatungpal ti urnos ken kapya, a nangital-o ti pakaibil-bilangan da nga institusyon.
Paset iti selebrasyon, nakatuding a mapadayawan dagiti opisyal ken kameng ti pulisiya ditoy La Union a dakkel ti gapwanan ken naitulong da iti panangipatungpal ti pagrebbengan kas pulis ken kadagiti programa a nakatulong para iti pagsayaatan dagiti umili.
Iti kaunaan a selebrasyon ti Philippine National Police Day ket indaulwan ni Executive Secretary Ralph Recto kadwa na ni PNP Chief Police General Jose Melencio Nartatez Jr., Department of Interior and Local Government Secretary Juanito Victor ‘Jonvic’ Remulla ken House of Representatives Speaker Bojie Dy idiay Philippine National Police (PNP) National Headquarters idiay Camp Crame.
