Sumangsango iti reklamo a panangdangran idiay National Bureau of Investigation (NBI) ti aktres a ni Rhian Ramos; beauty queen-actress a ni Michelle Dee, ken ti beauty queen politician a ni Samantha Panlilio.
Maibasar ti personal driver ni Ramos, pinagtulongan isuna a dinangdangran dagiti celebrities ken bodyguards da sadiay 39th floor Makati residential complex idi Enero 17.
Gapo iti pasamak ket ginandat na payen iti agbekkel ngem naisab-it isuna iti kable ken naiturong idiay 25th floor.
Kabayatan a pababa ket nakita man isunan dagiti bodyguards ti aktres ken insubli da isuna idiay 39th floor agingga a nakasangpet da Dee ken Panlilio.
Kinunana pay a naglabos ni Dee ken ipilpilit nga ipaiggem ti mamagbagi ti aktres kasaruno ti panangsabwag ti nasanger nga arak kenkuana.
Kadayta a kanito ket agtultuloy latta iti panagbugbog dagiti bodyguards ti aktres ken pinilit da pay isuna nga uminom iti isbo.
Iti agdama ket adda itan ti kustodiya ti Volunteers Against Crime and Corruption (VACC) iti biktima a personal driver.
Immunan a nangipila ti kaso ni Dee iti panagtakaw maibusor iti biktima partikular dagiti sensitibo a ladawan a nakaikabil iti ‘ampao,’ a rason tapno maidetene ti driver idiay Makati City jail ti tallo nga aldaw.
Idi agangay ket nakaruar metlaeng isuna kalpasan nga ibasura ti Makati City Prosecutors office ti nasao a kaso.
