BR LA UNION – Nagdesisyon ti Supreme Court (SC) En Banc a naan-anayen nga ibasura ti mosyon ti Kamara a mangkidkiddaw a baliktaden iti desisyon idi Hulyo 25, 2025 a mangibagbaga mailabsing iti Konstitusyon ti impeachment kontra kenni Vice President Sara Z. Duterte.
Pinasingkedan ti kangatuan a korte a ti maikapat a reklamo nga impeachment a naipatulod idiay Senado idi Pebrero 5, 2025 ket maipawil iti sidong ti Article XI, Section 3(5) ti Konstitusyon.
Saan a nakipaset ni Associate Justice Alfredo Benjamin Caguioa, bayat a naka-leave met ni Associate Justice Maria Filomena Singh.
Inlawlawag ti SC a dagiti immuna a tallo a reklamo ket saan a nairaman iti Order of Business iti uneg ti naituding a 10 session days.
Impaganetget ti Korte Suprema iti nagdumaan ti dua a wagas ti impeachment: ti umuna ket dumalan iti proseso ti Committee on Justice, bayat a ti maikadwa ket dagus a maipatungpal nu nagpirma ti apagkatlo (1/3) dagiti miyembro ti Kamara.
Pinasingkedan ti Korte Suprema nga agtaltalinaed a maipatpatungpal ti due process iti impeachment, ngem addaan daytoy ti naisang-sangayan a saguday ken ti panagusig ket sadiay Senado a maisayangkat.
Dagus a maipatungpal iti resolusyon kalpasan ti digital service iti amin a partido.
